YMA-IN SCHOOL ACADEMIC SESSION SAWIHO

Central YMA hnuaia Education Sub-Committee rawtna siam angin Ni 14.4.2011 (Ningani) nileng khan CYMA Hall, Tuikhuahtlang-ah School Academic Session chungchanga in rawn khawmna (consultation) neih a ni a. He consultation-ah hian Sub-Headquarters leh Group YMA aiawh te, Aizawl Khawpui chhunga YMA Branch hrang hrang aiawh te, mithiam sawmbik te leh zirna kaihhnawih pawl hrang hrang mi 110 zet tel a ni. Chawhma hun hi Pu Lalbiakzuala, General Secretary, CYMA kaihhruaina hnuaia neih a ni.

He hunah hian Pu Lalchungnunga, President, CYMA chuan Mizo ten kan ngaihhlut zawng thlak a ngaih thu sawiin “Mizoram-in ramdang mi kan mikhual ten an chhungte hnenah thlatin cheng vaibelchhe nga vel zet an thawn theih laiin kan thalaite chuan Bike chak tak tak a khalh bak an eng helh meuh lo” a ti. Ngaihhlut zawng thlak ngai zingah hian thalaite chauh nilovin patling te pawh an tel tih sawiin, Mizo te chu a mimal a fel, a huho a mawl kan ni a ti a, lu a tam zawh poh leh thluak a tlem mai a ni a ti bawk.

President chuan tunhnai a Lammual-a Grass phah thar hlim a Chapcharkut hmangtu thalai rual ten an dim loh zia a sawi a. Mizoram-a Bank lem tamna chhan chu dik leh dik lo thlu lova hausak thut tum kan tam vang a ni a ti. Thalaiten hnam rilru pu a zirlai an zir a ngaih thu sawiin BA/MA zawh tawh hnuah pawh intodelh kan tum miah lo chu in ngaihtuah chian a ngai a ni a ti a, kan thinlung a in buatsaih loh chuan Sairang thleng Rel a lo kal loh pawhin
chimral kan ni tho ang a ti bawk.

May, 2010 atanga CYMA-in ruihhlo do beihpui a thlak atangin Cheng vaibelchhe hnih chuang hu ruihhlo leh a kaihhnawih man a nih tawh thu sawiin, Pu Lalchungnunga chuan YMA-in Khawtlang nun siam that kum a kalpui mek chungin, loh theih lohna avanga ruihhlo do tel leh meknaah ruihhlo zuar hmeichhia leh mipa an man nawn tlut tlut te pawh thuneitu ten Jail-ah thla khat em pawh an tantir thei lo chu tha lo a tih thu a sawi bawk.

He “Consultation on School Academic Session” chung chang hi Pu V.L.Malsawma, Committee Member, Education Sub- Committee, CYMA chuan a sawi hawng a. Mizoram-in School Session a hman mek (January – December) leh India ram hmun dang a an hman (April – March) in ang lo chu engtia her rem tur nge tih te, Mizoram-a School Session a danglam bik avanga High School Level-ah harsatna a awm thin thu te leh ‘National Pattern’ anga in her rem ve a tul em? tih te sawiin thupui ngaihnawmtakin a sawi hawng a.

Chawhnu lamah sawihona hun hman a niin Dr. R. Lalengmawia, Chairman, Education Sub-Committee, Central YMA-in hun a kaihruai a. Sawmbik mithiam ten thu ngaihnawm leh bengvar thlak tak tak an sawi hnuin sawihona neih zui a ni. Sawitu tam ber ten tun a School Academic Session kan hman lai that zawkna leh thlak danglam hret a tul thu te thiam takin an sawi hlawm a. “Chutiang khatiang chuan tih ni tawh rawh se” ti a thu tih tluk nei chiah lovin sawihona eng hrereng chunga a tul ang a Education Sub-Committee, CYMA-in a lo zirchian leh tur a dah a ni.

He “Consultation on School Academic Session”-ah hian kan Branch aiawhin Secretary Pu Zokunga a tel.

Leave a Reply