YMA KALPHUNG INZIRTIR KAIHHRUAINA

2010 YMA General -Conference vawi 65-na chuan ‘Kalphung inzirtir uar rawh se’ tih a pass a, YMA chu hruaitu thlang thar thin a nih avangin hruaitu thlan tharte tan YMA kalphung zira Intuaithar zel a tul thin. YMA Dan Bu leh Chhiatni Thatni Kaihhruaina chhungah hian YMA inrelbawl dan tur leh kalphung a awm kim vek seng lo va, a hunlai a zirin pawl dinchhan leh thil tum tidanglam si lo va, hnam nunphung mila her rem thin a ni. Sawi sen vek erawh a ni lo vang, kaihhruai nan a tlangpui chauh han tarlang ila.

1) YMA nihphung: YMA hian nihphung, lian leh pawimawh tak tak a nei a, chu chu ‘vantlang mamawh phu hrua, zawldawh tak chunga rawngbawltu, politics rawng kai lo tlawmngai pawl, ramtina cheng Mizo zawng zawngte inthlunkhawmna pawl’ tih hi a ni. Tin, Sakhuana leh Hnamzia (Culture) inkawp rem taka a kaldun theih nana hmalatu leh humhalhtu a ni. Kohhran leh pawl hrang hrang, Political Party zawng zawng, mi lian leh mi te len vekna pawl awmchhun chu YMA hi a ni.

2) YMA Dan Bu & Chhiatni Thatni Kaihhruaina : Dan Bu leh Kaihhruaina te hi pawl kal dan tur inkaihhruaina a ni a, belhchian leh ngaih pawimawha zawm hram hram tur a ni. Dan Bu sawi baka mahni duhthua kalphung dang lo reh ve ngawt hi tih loh tawp tur a ni. YMA dinchhan, a nihphung, a thil turn, a thuthlung leh a kaihhruaina te hi vawna nunpui ngei ni se. YMA member te leh hruaitute tan YMA Dan Bu leh Kaihhruaina hriat loh lutuk hi zahthlaka ngaih a ni.

3) YMA Inkhaichhawn dan: YMA hian inkhaichhawn dan fel tak a nei a, ram chhung leh ram pawna Mizo zawng zawng thlungkhawmtu a ni. YMA pumpui khaikhawmtu chu Central YMA a ni a, chumi dawtah Sub- Hqrs., Group, Branch leh Section te a awm leh a. Chutiangin Aizawl Khawpui Branch leh rampawn Branch thenkhatte Central YMA-in direct-in a enkawl.
Pawl inkhaichhawn dan hrang hrang te, zah der leh ngaih pawimawh thiam hi pawl zahawmna leh inpumkhatna a ni. Branch YMA hmalakna ngai pawimawh viau, Group/ Sub Hqrs./Central YMA hmalakna ngaihthah tlat si a awm theih. A vai hian taksa pumkhat then hran theih loh ang hi a nih avangin ngaih pawimawh vek tur a ni. Sub-Hqrs. YMA leh Group YMA hnuaia Branch te chuan a theih hram chuan direct-a CYMA dawr te hi tih loh ni thei se.
Sawrkar leh pawl dangten thawhpui tur leh hmalakpui tura min sawmin, YMA tih awm ngawih ngawih pawh ni sela, mahni thua bawhzui nghal mai lo vin, Central YMA/Sub-Hqrs. YMA/ Group YMA hruaitute rawn hmasak phawta thu tihtluk thin a tha. Chutiang bawkin Section leh Committee peng hrang hrang pawhin hmalakna hrang hrangah Office Bearer te leh CEC/SEC/Group/Branch Executive Committee te hriatpuina leh remtihna lak hmasak a tha.

4) YMA inhungbik: YMA inrelbawlnaah pawl dang inrawlh a rem lo va, chutih rual chuan ram leh khawtlang tana thil thaah chuan Sawrkar leh pawl dangte a thawhpui thiam tur a ni.

5) Conference & Committee: YMA chu Committee thurel a kal a ni a, YMA-a thuneitu sang ber leh rorelna sang ber chu General Conference hi a ni. Hetah hian YMA kalphung leh hmalak dan turte rel thin a ni. Chumi dawtah Sub-Hqrs. Conference, Group Conference, CCC Meeting leh Committee hrang hrang a awm bawk. Heng Confer­ence leh Committee hrang hrang te hi kan inpumkhatna leh iutihchaktawn nana tul leh pawimawh an nih avangin YMA member te chuan, kan hlutin kan ngai pawimawh em em tur a ni.

6) Hruaitu: YMA hruaitu chu khawtlang, ram leh hnam tana hmalatu leh sulsutu, a tulna apianga hmahruaitu leh hnungdawltute an ni a; midang te tan malsawmna an ni hliah hliah a ni. Hotu ni lova hruaitu a nihna zawk hi vawnnun reng tur a ni. YMA hruaitu danglam bikna chu hruaitu nihna hi chuh chi a ni lo va, ‘Kei hi ka fela hruaitu tlak ka ni e,’ tia mahni intahluhna chi a ni lo. Chutianga tih ching an lo awm pawhin an daih rei ngai lo.

7) YMA Sum Vawn: Sum hi pawl hming hliau awlna ber a ni a, hman dan tur dik taka hmangin uluk taka vawn tur a ni a, a bo thiang lo, tibo emaw, hmang dik lo emaw chuan a rul leh ngei tur a ni.

8) Kumpuan: YMA General Conference-in Kumpuan a neih thin hi Central YMA bil Kumpuan a ni lo va, mahni thua Kumpuan dang lo neih ngawt hi tih loh tawp tur a ni. Group, Sub-Hqrs. Conference leh General Conference-ah te Kumpuan hi Thupuiah kan hmang thin a, YMA Day leh Seminar-ah te Thupuiah kan hmang bawk thin. Kumpuan hlawhtlinna tura theihtawp chhuah hi YMA member-te mawhphurhna a ni. Tin, Kumpuan hi puan a nih loh hnuah pawh ngaih pawimawh zui zel tur a ni.

9) Report & Documentation: Report hi YMA pum khaikhawmtu leh hmel lanna ber a nih avangin ngaih pawimawh hle tur a ni. Heng annual fee, budget, kumpuan bawhzuina, hruaitu hming, member zat te leh hmalakna report te hi ngaih pawimawh tur a ni. YMA Dan Bu-in a tarlan angin, ‘Annual Fee April thla ral hmaa pek tur a ni a, pelo chuan General Conference-ah rorel palai an tir thei lo vang a, vote pawh an thlak thei lo vang. Tin, September thlaah Hmalakna Report Central YMA-ah thehluh thin tur a ni,’ tih a ni a, report pek hi Secretary te mawhphurhna a ni.

YMA te hian thil tih chhuanawm tak tak kan ngah tehlul nen ziaka vawn that leh report pek kan taima lo hle mai, tan lak a ngai. YMA thil neih leh activity hrang hrang te hi ziaka vawn that ni thin se, hruaitu thar zelte tan hnuchhui a awl phah ngei ang.

10) YMA Lehkhathawn: YMA hminga lehkha kan inthawnnaah President/General Secretary te address-in, ‘Ka pu’ ti lovin ‘Thawhpui duh tak,’ tia bul tan hi kan tih thin dan a ni. YMA hminga lehkha kan inthawnnaah Commit­tee thuchhuak ngei a nih thu tarlan ni thin se, a lo dawngsawngtu tan a ngaihthatthlakin pawm a nuam bik bawk. Tawngkaa thu thlen tul chang awm bawk thin mahse, lehkhaa bawhzui leh ngei a tha.

11) Central YMA Thuchhuah: Central YMA thu chhuak reng rengah — Sub-Hqrs./Group/All Branch tih a nih chuan Branch leh Group zawng zawng direct-in lehkha semchhuah a ni tihna a ni a, Sub-Hqrs./Group/Aizawl Khawpui Branch YMA tih a nih chuan Sub-Hqrs. YMA/ Group YMA-ten an hnuaia Branch te hriattirna an lo pechhawng tura ngaih a ni.

12) YMA Seal & Letter Head: YMA Seal reng reng chu Central YMA-in a siam tur a ni. Chuvang chuan YMA Seal nei lo leh siamthat ngaiten Central YMA kaltlanga siamtir tur a ni. YMA Seal leh Letter Head hman hi fimkhur em em tur a ni a, a hman kawngah thawhpuite rawn hram hram thin ni se. YMA Seal leh Letter Head hi mimal leh tu emaw hamthat nana hman ngawt hi tih loh tawp tur a ni.

13) Pem Lehkha: YMA-ten Pem Lehkha inang tlang hman tur a ni a, Central YMA Office-ah Rs. 100/- a lei tur a awm a, a nei lo chuan lei a, dik tak leh fimkhur taka dahkhah kim hnuah chauh pekchhuah thin tur a ni.

14) Kutdawh Lehkha: YMA tan Kutdawh lehkha siamsak hi a mawi lo, mahni Branch huam chhungah Kutdawh an awm lohna turin mi harsate dawmkan leh chhawmdawl kawngah theih tawp chhuaha tanlak ni zawk thin se.

15) YMA Hnathawh: YMA hnathawh leh thiltih chu belhchiandawl, langtlang, ngelnghet, tlo, mawi lehthazawk zel a ni tur a ni. Mimal leh Sawrkar-ah sum tuakna kan dap thin a, hengahte hian belhchian kan dawl tur a ni. Hlep tam loh hlauh vanga phuailuai deuha thawh hian mi dang tan kawng kan tiping thei a, YMA hming a hliau phah dawn ai chuan hlawh nei mang lo pawhin thawh kan huam tur a ni. YMA hian inrelbawl nan sum mamawh thin hle mahse, sum um luat avanga lei theih pawla chhuah erawh kan phal tur a ni lo.

16)Hengte hi- YMA tih tur leh nunpui tur a ni:
a)Tanpui ngaite tanpui.
b)Chanhai riangvaite puitu, lusunte hnemtu.
c)Rikrum leh chhiat tawh nia mawhphurhna hlen.
d)Tlawmngaihna.
e)Aia upa zah.
f)Ruihtheih thil laka fihlim.
g)Thisen pek.
h)Thawhchhuah mila nun.
i)Sum tuakna ni lo hnatlang uar.
j)Haw hawa thil nawr loh.

Issued by : Central Young Mizo
Association, Aizawl

2 Comments on YMA KALPHUNG INZIRTIR KAIHHRUAINA

Leave a Reply