YMA Kumpuan Hawn A Ni

Kum 2010 chhunga YMA Kumpuan, ‘Khawtlang Nun Siamthat’ tih chu ni 28.1.2010 (Ningani) khan Vanapa Hall-ah Home Minister in a hawng.

YMA Kumpuan hawnna inkhawm hi Central YMA President, Pu Lalchungnung’n a kaihruai a, Home Minister chuan hetiang hian kalkhawm te hma-ah thu a sawi;

Mizoram Bru-Displace People Forum (MBDPF) General Secretary man anih chungchangah, hnam hruaitu inti ve si, mi tualthihnaa inhnamhnawih chu pawi a ti hle, President/Gen.Secretary pawh nise hnam tihchhiat tumtute chu man zel anni ang. Kan dim dawnlo ani tih hi midangte pawhin hria se a duh.

Mizoramah HIV/AIDS a pun zel thu sawiin, Mizoramin mi ruala AIDS dona kawngah ke a pen ve tho thu a sawi rualin, State dangah a tlakhniam zel laiin kan ramah chuan a pung zel a. MSACS hnuaia NGO te hian AIDS hi do tak tak lovin, a hmanrua sum hi kan duh zawk lutuk a ni thei em? a ti a, “HIV hi sum avang chauh hian kan do em ni?” tiin zawhna a siam a ni.

YMA -in kumpuan atana ‘Khawtlang Nun Siamthat’ a hman hi Mizorama khawtlang a chhiat tawhzia a lantir theih thu sawiin, ‘Kan ram sualna avanga tluchhe mek chhanchhuak tura thian chhan thih ngam Mizo nula leh tlangvalte’n hetianga hmalak kan tum hi a phurawmin a thlamuanthlak tak zet a ni, a ti. Khawtlang nun siamthat tum tur chuan, a siamthat tumtute an insiamthat hmasak a tul thu a sawi bawk.

Mizoram chu a thim zawnga thlir chuan a chhe ta vek emaw tih tur a nih thu a sawi a, ‘Baal hmaa thingthi ngai lo, khawtlang nun siamthat tum thalai zingah tamtak an la awm tih han hriat hian a thlamuanthlak a ni, a ti. Tih takzetna nena an tum ram thleng ngei turin, theihtawp chhuah turin YMA member kalkhawmte a fuih.

Kum 2010 YMA Kumpuan hawnnah hian thupui ‘Khawtlang nun siamthat’ tih hmangin CYMA Vice-President, Pu C.Zoramliana leh CEC member, Pu JH. Zoremthanga te paper present an zirho a. Kalkhawm YMA member te’n Paper present atangin sawihona hun an nei nghal bawk.

Keini veng branch pawh hian hun remchang hmasa berah Kumpuan ‘Khawtlang Nun Siamthat’ tih chu programme phuisui zawk a hawn ve tum a ni.

Leave a Reply