YMA KUMPUAN: Ram Leh Hnam Humhalh

Mizoramah hian Mau chi hrâng atam êm êm a, Mizoram hmun hrâng hrângah hian a awm deuh vêk a ni. Kan Pi leh pute hun lai daih tawh ah khan Mau hi êngkîm êngkîmah an hmâng a, Mizote kan chanchin hmalam kan thlir let chuan kan Pi leh pute chuan Mau chi hrang hrang hmangin In leh lo, hmanrua, sîlh leh fên, ei leh in nân, sêkrêk êng êngemaw a tan an hmang tangkai êm êm a ni. Mau hmanga khawsa teh meuh mai kan ni a. Pi leh pute chanchin ziahna ah hian Mau hi a inrawlh lo emaw kan tih lâiin kan sawitâk âng khan khawihmunah ênghmunah pawh Mau êngemaw tâl hmanna an nei ngêi ngêi a ni. Mizoram-a MAU chi hrang hrang te ;-Ankuang,Aspar-Mau, Aurea-Mau, Balkaw-Mau, Châl/Rawtê, Châlte/Châlzâm, Dampa-mau, Latiflorus-mau, Lik/Tho-thek, Mannii-mau/Shillong-mau, Mau-dâng, Mau-raipuar/mau chângzing, Mautak & Mau-mit, Moso-mau, Nât, Phar, Phar-chi-khat, Phar-suak, Phulrua/Rawpui & Phulraw-lak, Phungki-rua, Rallêng-mau, Rawchhia/Raw-chhe-chângdam/Raw-vung, Raw-thing, Raw-eng, Raw-hlîng, Raw-lak/Rawchângdam/Raw-pui, Raw-lian, Raw-mî, Raw-nâl, Raw-ngal, Raw-thing, Raw-thlâ, Sai-man/Sai-man hnâng, Sai-rîl, Ta-lân, Tûrsing, Vai-rua.

Hetiang ang khawp hian Mizoram-ah Mau atam in a chi hrang hrang atam em em a, kan tangkai pui tak zet zet a ni. Heng kan Mau te hi a hmanna han tarlang leh ila; Chawhhmeh atan te, in sak nan te, lehkha siam nân te, furniture atân te, ply-bamboo atân te, êm/kho siam nân te leh hralh tûra thil siammawi atan te hman a ni a, lei dawh nân te, tui-ûmah te, a thên chu a mawi avangin in bulah leh park-ah te phun a ni a, pal-ah te an hmang bawk. Kan Mau thenkhat chu a tha êm êm a, a tangkai hle bawk. In sak nâna dawhsan atan te, a hnah ranchaw atan te leh leihlawn atan te, lehkha siam nan te, tin, eng Mau pawh hi a tuai chawhmeh atan kan hmang deuh vek awm e.

Raw lian vâklo te chu inchhung Ceiling leh pindan bangah te, thlâm dâpah te, zêm kawlh nân te, flag ngulah te, tuibûr mawngah te, sahzum leh thembupuiah te an hmang a, tin, Châl-tê ang chi hi chu zâmpherah te, basket-ah te, naupang lâwm siam nân te, ceiling leh pindan bangah te, nihliap kuangah te, pal hung nân te, hmerhhnângah te, an hmang bawk. Tin, Mau thenkhat chu tui pipe atân te, chopstick(China chaw eina hmawlhtê) atân te hman a ni. A hmanna te sawi zel ila, chhâwlbûk(hut) sak nân te, nghakuai ngul atân te, lukhum (khumbeu)atân te, tiang atân te, thlangrâ atân te, âr/vawk-âwt atân te, bang atân te, chawchhum nân a leh tuah atân te hman a ni. Mau-Tak phei chu in sak nân-chhuatah te, bangah/ceiling-ah te, dichûmah te, a hnah inchungah te an hmang a, ai-âwt atân te, tu-thlawh/ha-chhek/hrei-hâ atân te, a zung chemfawng atân te, Chê-raw kân nân a kung hi an hmang thin, a rah a ei theih a, ran leh ramsa leh sazû te’n an tlan thin.

Kan râm Mau chi hrâng hrângte amal theuha an tangkaina kan ziak sêng lo âng a, kan hman dân atlangpui tarchhuah a ni. Han sawi zui zêl ila, mau thenkhat chu thil siam mâwina atân te, plywood siamna tha tak tak leh hmerh hnângah te, hmanlai chuan sa chan nân te a hman thin te pawh a awm, themtangah te, arbâwm te, thlâm dâpa hman leh dâmdawia hman te pawh a awm. Phungki-Rua hi Industry atân a that êm avângin sum lakluhna atân a tangkai em em a; in sakna hmanrua chîtin atân bâkah, fei/furniture, êm/kho/zampher,thil mawi siamna, hmunphiah vawnfung, tuah atân, a chî an ei thin bawk. A then chu lawng ngul leh pângpâr khawina mawi tâka siam nân te, inchhun atân,ban atân te ran chaw, agarbati stick atân te, thil cheimawi chi hrang hrang siam nân te, Mizo chhungkua tinin a kan neih theuh kho/fawng siamna te a ni. Raw-Nâl hi a pawimawh em em a, Pi leh pute leh thingtlang lamah chuan insak emkimah atân hman reng a nih bâkah êm chi hrâng hrâng ‘dawrawn/paikâwng/paitereng/- êmpai/êmping/tlâm-êm ah te, pher(thlangra-lian)-ah te, zâmpher-ah te, thlangra-ah te, faikhiat-ah te, fawngtelaivêl-ah te, paihpêr-ah te, hmerhhnâng-ah te an hmang ber. Raw-Ngal hi khumbeu, sahzum leh thembupui atân,-phênglâwng atân, hamthal atân te,.etc. Raw-|hing chu cement concrete do nân te, lei dawh na, thlangra lian,zampher,plybamboo,furniture, si-sêp atân, êm/paikâwng/kho, sairawkherh ngul atân, tuah atân, a zung Chemfawng atân insakna hmanrua chi hrang hrangah hman a ni. Raw-Thlâ; in sak nân te, dâpah te,zâmpherah te, thlangrâh te, êmah te,kho/fawng-ah te, chingalthlawrbûrah te, sahzumah leh thembupuiah te, thal bâwmah te, a kûng thil chhum nân te, a tuai chawhmeh ah te, tui chawi nân leh nihliap siam nân an hmang. Sai-man-hnâng; a hriamin a nel êm êm a, hmerhnângah te, themtangah te, khumbeu ah te,faikhiatah te an hmang. Sai-Rîl; khumbeuah te, kho/fawng ah te, chhihrîl/vaihrîk/vaisâwn atân te, faikhiat, Mizo-sairawkherh hrui leh a phan atân te, thil tâwnna hnâng atân te an hmang. Hritlâng damdâwiah Sairîl kûng chhûnga tui hi an in thin a, sam tihto nân te, samtuak tihreh nân te, luphut leh sam tlâk loh nân te Sarîl tui hi lû-ah thawrin emaw, a hnawihin emaw an hmang thin. A rah mu hi a lian a, a ei theih bawk. Ta-Lân; Mau-tak aiin a chhah a, a ngîlin a khawng zâwk bawk, a puak keh vê lo va, di-chûmah a tha êm êm a, leihlâwn atân, pandal sak nân, vaibêlah te, khawhtheihah te an hmang ber. Mau-tak aiin a nâ a hriam a, a nel zawk bawk a, hnângah an hmang thin. Tûr-Sing; India rama hman nasat ber a ni a. In sakna hmanraw chi hrang hrang( inchhun,inchung,bang, chhuat,in sak nân a dawhsân siam nân., etc) atân te, leihlâwn, lei, furniture,êm/kho,zâmpher, vaibêl, tiang-hawlna, fei ngul,nihliap kuang, puan in kaihna hmanrua, lawngngul, thil-fawng/hâ saim nân te, lehkha, tuah atân te, a hnah rawn chaw atân te, a tuai chawhmeh atân te an hmang. ( Heng Mau chanchin kan rawn ziah hi, Mizoram Mau Chanchin, “National Agro-Forestry Bamboo Mission”,.Lehkha bu-a atanga a pawimawh zual rawn suarchhuah a ni.)

Hetiang âng khawp hian Mizoram-ah Mau chi hrâng leh Mau hmanna chi hrâng atam em em a. Mitinin kan Mau te ati chereu zawnga phusa lovin, dinchhuahpui theih ani tih hriain i enkawl/humhalh theuh ang u. Mau humhalh that, tihpun leh dimdawi taka enkawl hi a finthlâk dawn chauh a ni.

Leave a Reply