YMA KUMPUAN: Ram Leh Hnam Humhalh – Mizotawng hman uar kawngah.

Sap hming vuah hi Sakhuana ina akentel anih chuan sawisel theih ani hauh lovang, mahse sakhuanain minphuar ve anih si loh chuan engahnge i fate sap hming i puttir tlat le. In ran khawite kha kan rama seilian tur leh i chenpui tur tho ani a, sap hming i puttir kher angai a mi, Kum 20 chhung pawh Zotawng thiam chuanglo tur kha engahnge Saptawnga i biak ziah kher. Khawtlang hruaitu luber Local Council ten anhuam chhunga dan zawmlo te lei achawitir dawnin a khirh teh reng nen tupawh hnamdang anni emaw English Medium School din te chuan an huangchhunga an sikul naupangte Mizo tawng hmang apiang Pawisa an chawitir hmak thung. School awm de de tawh chu English Medium ani deuh vek tawh a, hei hi a pawi lemlo inlamah kan fate Mizo Medium in kan lo khuahkhirh ve tho. Mahse, Mizotawng ziak leh tawngkam dik tak kan lo zirtir ve erawh angai khawp mai.

Kutziaka thu thawn chu a changkang tawhlo maithei e, mahse, hna dilna, sawiselna(complaint) emaw sorkara dan hmanga tanpui dilna, misual hrilhhriatna ang chi ah te Zotawng vek hman theih nirawh se, tin, ziahna form pawh neih nise Mizotawng veka ziahluh theih a siam ni rawh se. Kan ramah chuan Sorkar kaihhnawih leh khawi Company pawh ni rawh se, MIZOtawng vekin hna kan thawktlang vek tur a ni. Mizotawnga thawh theihlohna hmun Mizoramah a awm anih chuan Mizoram tan thil thalo tak niin Mizoram an chhuahsan vat a ngai tihna a ni.

Kan Mizo hla phuah thiam tak takte khan Saptawng leh Mizotawng kailek ching tawh suh u. Saptawnga hla lo phuah ve kher angai lo, eng kan nih phah loh hi, sap hla sain local channel-ah (record) thun ve lo mai teh ang u, video clip pawh siam lo mai ang u aw, kan phuah ve thiamlo anih chuan Mizo hla hlui saktur atam lutuk, sapzai hi keini tan a ropui hran lo a, atam zawk hi chuan kan hmu ropui teh vak lo.

A tawp berah chuan; Khawvel changkanna ina a kentel information technology hi a ni. Kum chu sawiloh, a thlabi tuk ang mai hian electronic thiamna lam technology a thang chak em em mai a, mitin in Smartphone kan hum fur maizawng anih hi. Thiamna san zawng, nei leh neilo lam athliar teh chiamlo, kan nitin nun zawng zawng chu kutphah tiatlekah a innghat faita vek mai. Hei zet hi zawng inkhuahkhirh ahar khawp mai, sawi zui tam lemlo mai ang. Mahse, he information/media technology sang tak lo chhuak hi Mizotawng thehlarnan avan tha tak em aw. Tawng teh vak lovin thu tamtak a thawn zung zung thei a, video/ picture(thlalak) angialanganin a thawnchhuah theih. Thuziak ngailote tan lah mahni vei zawng duh duh ziah theihna zalenna hmun a ni. Mizotawng ram hrang hranga thehdarh theihna hmun remchang tak a ni. Kutphah tiatlek Smartphone kan lek mai mai-ah film pawh kan changthei hial awm e. Mahse, hmangsual kan pung tual tual a, Mizo kan nihna theihnghilh thak khawpin kan sawpnawmnah hle a ni.

Heng WhatsApp leh Facebook- ah te hian kan fimkhurlo lehzual a, Mizotawng mahni tawng takngial pawh type/chhu/ziak zikchhuak peih lo thalai leh kum lama upa zawk te pawh kan awmnual mai. Kan tawng kan pawngsual tihna a ni a, mahni hnam tawng ziak pawh chawisang peihlo na na na chu Mizotawng chhu/type ngai tawhlohna hmun chu pan mai teh u. Mizo tawng Grammer nêna inmil thlapa ziah chu thenkhat tan chuan aharsa ve deuh ang, hriatthiam theih a ni, mahse, hawrawp ziakkim peihlo, lamtawi (Mizotawng-ah lamtawi a awm hranlo)a ziak, then sawitum nena hawrawp inangmiahlo, thuziak chanve leh Emoji nena chawhpawlh, Mizotawnga thuziak nisi a thumal dah kim peihlo leh thuziak kim manglo Zotawng chanve hmun hrang hranga suankual peih em em ho khan sim vat ang che u. Mizo tawnga intawng peihloh leh ziak/chhu/type dik peihlo ho khan vawi khatmah rawn inlar ve tawh suh u. Ram hmelma inniin Zotawng ral tial tial chunga mawhphurtu in ni. Zohnahthlak unau zawng zawngte Mizotawng aral lohnan thuziak i uar sauh sauh ang u. Internet thiamna hmanga thuziak thawnna chungchangah Mizotawng dik tak hmang uar ila, whatsapp leh facebook te hmang tangkai thiam ila, Mizote la tlemin inthlahpung chaklo hle mah ila India ram chu sawiloh ram hrang hrangah kan TAWNG ziak dik tak hmanga kan inthehdarh a tul hle mai. ‘YMA Kumpuan, Ram leh hnam humhalhna’ atan Mizotawng dik taka ziah intihhmuh angai. Whatsapp, messages etc. hmang fimkhur ila, mahni tawng ngei in text messages type/chhu/ziakdik tum tlang ila, Mizotawng diktak hmangin SMARTPHONE i kaihruai zawk ang u. Mitinin Mizotawng diktak a thuziakin i ineltlang ang u, Mizotawng uar sauh sauh ila, i inzir tha leh ang u.

Tin, fiamthu leh intihhlimna ang chi reng reng ah pawh Mizo mahni hnam tawng pai luihna ang chi hi chu inzilhhauh deuh pawh a pawi lem lo. Tun lai Local Channel/Tv vel a fakna/advertisement/entertainment/fiamthu angchi ah te hian Mizotawng pai luihna a tam em em a ni. Heng hi tihtawp a tha khawp mai. Heng te hi kan tih loh tawp tur a ni. Mahni Tawng pai lui thin te hi WhatsApp leh Facebook,..etc vela A AW B type kim peihlo te nen hian in angkhat vek an ni. Mahni Hnam Tawng hi a pawimawh ber a, Mahni Hnam Tawng ziak diktaka hman kan uar a ngai.YMA takin Mizotawng/ziak hmang uar rawh.

‘YMA Vul Zel Rawh Se’.

Leave a Reply