YMA LEH KOHHRAN

– C. Zohmingthanga (M-Section)

YMA hi kum 1935 a din a din a ni tih chu kan hre theuh awm e. YMA ( he tih lai hian YLA tih a la ni) din tute chu missionary-te leh kohhran hruaitute an ni. Mizote hi pi leh pu hun lai chuan raldo thin leh hnamdangin ‘lu la hnam’ ti a min sawi thin kan ni. Tuifinriat rala mingo hnam hmanga zawn chhuah ram kan nih mai piah lam ah, anni hian kristianna leh kohhran ngelnghet tak min siam sak a, chu mai pawh nilovin rampum huap zofate rilru hmunkhat min puttir theitu tur pawl thianghlim leh tha, YMA an lo din tlat mai kha a makin a ropui a, a hnam ang zawng pawha vanneihna nasa tak ava ni em! Hei vang hi ani ngei ang, kohhran nen pawh pheichheh rual takin an pen dun thin ni.

Mahse, in ti teh ang, khawvel hmasawnna sang zel leh hun in her zel ah hian thalaite zing ah YMA leh kohhran len dun tir thiamlo, kohhrana in hman duhtawk a, YMA thlauh thla ta daih mai te hi kan awm ta em ni aw! tih mai tur pawh hmun thenkhat ah chuan a awm thin. Kohhran pawn lama rawngbawlna kawngka zau zawk in hawnna a ni tih hre thar chunga YMA chawi nung zel turin nang leh kei hi kan pawimawh hle mai.

Kan missionary-te’n tuifinriat ral, ram hla tak atanga zum leh hriam leh harsatna tamtak paltlang a India hmarchhak kil tawp a hnam huaisen leh hnam mawl kawlhsen tak ni thin, khua leh khuate pawh in run a, indo thin mizo hnam min hmangaih a, chanchintha min rawn thlen a, mitthi khua (pialral) aiah van jerusalem thar min thlir tirin, lungloh tui leh hawilopar dawn thin chu chatuana nunna tui min dawn tirin, Vankhua leh tuia min siam ringawt pawh a lawmawm tawh teh lul nen, kohhran tluk thawthanga pawl thianghlim leh tha, a motto pawh mitin huapzo, zofate tana tha em em mai YMA min han din sak leh zel te hi a ropui a, kan Pathian hian Zofate hi enganga thukin nge maw minlo duhsak le.

Heti zawng hian sawi ta ila, tihtak takah chuan kan ram ah hian kohhran hrang hrang kan tam tluk zetin kan kalphung leh rorel dan chenin a in ang lo in a in persan ta nawk mai. Kan thurin (doctrine) a in an loh avanga kohhran thawkho thei lo pawh kan awm nual awm e. Chutianga kohhran thurin a in an loh avanga thawkho theilo te pawh YMA hmalakna atang chuan lungrual takin kan thawkho thei tlat si te hi a ropuiin a hlu a, mak tihloh rual ani lo. Hetiang ang a pawl (association) tha hi khawvel hmundangah hian a awm ve angem le?

Pathian hian he zoram zim te hi min hmangaihin min lo duhsak chungchuan em avangin khawvel hmun dangte leh hnam changkang zawk te pawhin an neih ve loh pawl ropui kan nei hi alawmawm a, i ngaihlu in i chawi nung zel ang u. A kal sual palh theihna leh ahmingchhiat palh theihna lak ah keini zofate leh YMA memberte hian i vengin duat takin chawi nung zel ila, ‘YMA a chak lohna veng leh khua chu a nuam ngailo’ an lo ti thin a, kan veng leh ram leh khawtlang a nawm zel theih nan duat takin i chawi nung zel ang u.

YMA zofate tan vul zel rawh se

Leave a Reply