YMA leh KRISMAS

– Zokunga
Secretary, NYMA

YMA thil tum leh dinchhan pawimawh tak pakhat chu “Kristian nundan tha ngaihsan” tih anih miau avangin kan chetvelnaah hian Kristian Sakhaw tana hun pawimawh ber pakhat Krismas hian nghawng a nei thui hle thin a, hruaitu inthlan thar hun atan pawh Krismas vuakvet hi kan tinzawn fur niin a lang. Committee koh leh hmalakna thar ruahman chung changah pawh thui takin Krismas hunpui lo thleng tur hi thlir tel a ni thin. Kristian Sakhua lo chhuahna vawiin a Lal thar lo piang hian YMA nen in zawmna thui tak a la nei reng a, chu chu hruaitu thar a piangin an chhawmnung satliah mai ni lovin, uar zawkin an kalpui zel niin a hriat a, a lawmawmin chhunzawm zel pawh hi Kristian nun dan tha ngai sangtu pawl tih atan thil in hmeh tak pawh a ni reng a ni.

Ngaihlai tizual tur renga’n maw
Chutianga Krismas hunpui lo thleng tur chuan YMA te tana hmun pawimawh tak a luah thin miau avang chuan hun kal tawh a YMA hminga kan thil tih leh tawn tam tak te rilruah a thar lo thei thin lo. Mitthi lumen zana kan zai tlaivar pui te, a sur a sa hnuaia kan thlan laih pui leh kan hnatlan pui thin zawng zawng te nen a hun kan lo hman ho thin te kha hun rei tak ngaihtuah chhuak tawh lo mah ila, he hunpui a lo thlen meuh hi chuan tum reng vang pawh ni lovin thinlungah a rawn thar a. Ngaihtuah loh tum lahin rilruah a lut thuk tulh tulh mai zawng anih awm hi maw! A awm reng a ni.
Krismas boruak thlasik ni eng mawi leh zan boruak thiang vak mai te hian lunglen a kaitho a, kumpui linglet a YMA hminga kan hun lo hman liam tawh tam tak te ngaihtuah kirin lung a ti leng vawng vawng thin reng a ni.

Kumsul liam hnu kan nun ngaih lai tho leh thin,
Rem Lal pian hun champha hmatiangah kan thlir;
Sik ni eng mawi leh zan boruak thiang leng vel,
Ngaihlai tizual tur renga’n maw?

Kan thinlungah lal ber ang che
Kristian sakhaw vuantu mi tam takin Krismas hlutna pawh hre fumfe tawh lova mahni tisa mamawh zawng ngaihtuah reng reng a hun kan hman lai hian, kan chhehvel a ringlo mite tan phei chuan Krismas hian hlutna a nei tam lua lo maithei. Ringlo mi ten chu Chhandamtu lo piang chu an lo lawm ve lo anih pawhin kei ni Kristian nun dan tha ngai sangtu YMA Member-te hi chuan lawmna chang kan hriat a pawimawhin vawiin a kan tana nau lo piang hi kan thinlungah lal ber atan kan neih ngei pawh a pawimawh hle ang. Kan tana fapa lo piangin a ngaih pawimawh em em midang te nen a inremna nei turin tlawm a tul hunah tlawm ngam ila, kan ai a dinhmun chhe zawk kan bul hnai a awm te a tul ang a tanpui thei turin vawiin atang ngei hian i inbuatsaih thar mawlh ang u.

Aw, thlir zel ila, Bethlehem tlangpui,
Ran in tlawma Chhandamtu piang chu;
Hmana mi ten lawm lo mah sela,
Lalpa, kan thinlungah lal ber ang che.

Rem Lal piang chuan thinlai hnem rawh
Nikum Krismas leh kumin Krismas inkarah hian Nursery veng atangin mi 18 zet thihna avangin kan in thlahliam a, chung zinga mi 8 zet chu YMA a kan member pui te an ni. Thihna avanga kan then tak te nen he Khawvel a kan awm chhungin kan in tawng leh ngai dawn lo tih han suangtuah chang hian lunglen a zual lo thei thin lo. Kan zinga an awm lai a kan ti ti ho dan te, chhiatni thatni a midang tan a kan phak tawk ang te te a kan chet ho dan te, a theih ang ang a kan khawtlang hmasawnna atana ke kan lo pen ho tawh dan te han ngaihtuah let hian a lunglen thlak a, an tel lova Krismas kan hmang tur hi a huphurhawm tak zet a ni. Chutiang dinhmun lungchhiat thlak taka ding mek YMA Member zingah kan awm anih chuan vawiin a kan tana nau lo piang hi thlir tlat ila, thihna emaw thil dang vang emaw a kan rilru natna zawng zawng lak kian in a awm ngei ang.

Leng zawng thinlai damten lawm kim tak ang maw?
Rual duh kal ta suihlung rualpuite zawng kha;
Ngai mah ila, koh kir leh theih awm si lo,
Rem Lal piang chuan thinlai hnem rawh.

Hlimin lawm la, Lal lo piang chu
Kum kaltaah khan chhungkaw kimin hlimtlang takin Krismas kan lo hmang a ni thei. Kuminah thihna leh thil dang vangin chhungkaw kimin Krismas kan hmang thei dawn lo anih chuan a khawhar thlak ngawt ang. YMA thlirna tlang atang pawhin kan thawhpui mi tangkai tak tak te tel lova Krismas hunpui kan han hmang tur hi huphurhawm tak a ni. Engpawhnise, YMA a kan sangawi-zawn-pui thin zawng zawng te kan rilruah in cham reng a, in awmna hmun apiangah he Krismas hunpui lo thleng hi dam tlangtak leh hlim taka hmang turin NYMA Member-te hian duhsakna kan hlan mawlh mawlh che u a ni.

Chhung tin lawm lai par ang vul ni leh hun te,
Engtin hmang maw, kar hlaa leng rual duhte’n;
Thinlai damten hmang la, he hun lawmawm hi,
Hlimin lawm la, Lal lo piang chu.

Chibai bukin i kal ang u
Kristian leh tian lo te pawhin he hun pui lo thleng tur urlawk leh hlimtaka hmang turin kawng hrang hrangin kan inbuatsaih leh ta mup mup mai. Chutiang a mi ten hlim leh lawm taka Krismas hmang tur a an inbuatsaih lai chuan kei ni hi mittui nen a lo in dawm kun reng tur kan ni bik hauh lovang. Thihna te, retheihna te, sualna te, natna leh thil dang tam tak avangin krismas hi hlim taka hman kan huphurh a ni thei. Thinlung taka tawngtai chung a chutiang harsatna kan neihte chu vawiin a kan tana lo piang Lal Isua Krista hnenah kan thlen anih phawt chuan, hlim leh lawm taka a piancham pha kan hman hi a rem ti mai ni lovin, a duhthusam a ni tih hre thar leh ang u.

Keini pawhin lawmna zai hla i rem ang,
Tumah thin na leh lunglen pawh sawi lovin;
Bethlehem-a nau piang Immanuela,
Chibai bukin i kal ang u.

Nursery Veng Branch YMA member zawng zawng ten kan awmna Kohhran theuhah hlim leh lawm takin kumin Krismas hi hman tum ila. YMA Member kan nih angin YMA thuvawn “YMA chu tanpui ngaite tanpuitu a ni” tih kan thinlung a vawng nung rengin, midang tana thil tha tih nan leh khawtlang tana tangkaina nei ngei tura rilru inbuatsaih chungin Bethlehem-a naupiang Immanuela chibai i buk ve ang u.

Leave a Reply