YMA LEH ZIN DAWN ZAN

– Zokunga (Jk-a)

Tahrik Ni 9.8.2011 (Thawhleh) tlai dar 4:15 vel a ni a, a tuk mai a Gauhati-a Sawrkar Ukil rawih lai hmuh ka ngaih tur thu in min deng dawt a. Mitthla-ah Amfii nu te, YMA-a ka thawhpui te, kan Kohhran Upa te, LC hruaitu te, VC Hall leh Biakin chenin an rawn lang zut zut mai (ka OB puite zin tur hian an mitthlaah thil tam tak hmu ve bawk mah se, Upa te leh Biakin te kher hi hmu ve thin tak maw?). Gauhati hi mi tamtak tan chuan chil pik phak an sawi ang lek a ni a, kei atan chuan khulai thleng thla tur khuan ralpui phiar a phiar loh theih a ni mawlh si lo.

Sawrkar hnathawk nih ang a kan duty ni tho mah se, hetianga THUT thil a zin tur hi chuan In lamah phalna dang lak ngei ngei ngai a awm thin avangin rang mangkhenin chhungpuinu SMS thawn a ngai nghal lo thei thin lo.

“Ne tih, naktukah Ghti kal ngai thut meitei.”
“A tul lo hrim hrim, i chak a niang chu.”
“Chuti lam a ni lo. Sawrkar thil a ni a, kei a hnial theih a ni hlei nem.”

Zinga ka chhuak tur kha chu boruak tha tak hnuaiah kan in thlahliam kha a ni si a. SMS chhanna dang hmuh zui tur a awm tak lohah chuan ngaih a tha lo tanin tlai Office banah eng thil tak tawng ang i maw? tih ngaihtuah loh theih a ni ta lo. Boruak rit thar ta deuh thut tih ziaawm beisei chungin Minute 10 vel hnuah in thlahrung takin “Lo in bual fai deuh pawh a tha ang a…” tih ka’n hmet khur leh dar dar a. Ka zin lo haw hnu, vawiin thleng pawh hian ka Inbox-ah chhanna a la rawn thleng ta rih lo anih awm hi maw.

Zan a lo ni a, fur lai tih takah ruah a sur duh phian mai. Zin dawn te hi chuan han mut hma deuh te pawh hi taksa tan a tha an tih ka hrereng thin a, ka pawm zawng tak pawh a ni. Mahse, kei zawng YMA-a ka sangawi zawnpui te hi MUP Member ni tep tawh te an ni hlawm a, kan tlangval neih ve chhun ber lah hi chung ho ai mah mah a haw hman hmawh lo leh zan mei rei ngam a la ni zui bawk si. A hminga Secretary ve berin “zan dangah OB meeting chu kan nei zawk mai dawn em mi?” han tih em chu a mawi mang chiah silo. “A… engpawh nise zin tur te kan ni bawk a, Pa valai tak kan la nih te hi chu kan thiante pawhin min hriatthiam pui ve em ang chu maw” ti rilru chungin phur fahran lovin Putea te In lam panin ka tei chhuak ta nge nge a.

President : Zanin chu thurel tur hmanhmawh thlak kan nei pawh a ni zeng lova, han in hmuhkhawm a han ti ti ho hrim hrim te pawh hi pawl tana a that bakah, hei, kan Secretary hi naktuk maia zin tur te a ni bawk nen thingpui te in ho ila ka’n ti deuh a ni.

OB dang : A tha khawp a lawm. President nge nge hi chu ruahmanna i siam thiam thin e.

Secretary (a rilru in) : A va han tul lo mai mai. Thingpui te chu mahni in lamah in ve mai awm. Lalnii te thingpui lum lah hi Bawng zun a ang deuh rauh a, a tui lo thei ropui si.

President : Engpawh nise, kan in hmuhkhawm takah chuan Executive Committee thudah bawhzui ngai tur awm te Secretary-in han report se, a tul angin ruahmanna kan siam zui dawn a nia.

Secretary : Nguntaka Executive Committee thurel han en hian tun mai a bawhzui tur chu a awm lo anih hmel. Thil thenkhat phei hi chu OB ten mahni in lama ngaihtuahna sen hmasak zet hnuah zan danga la ngaihtuah that leh mai pawh a finthlak zawk maithei a ni.

President : Chutia thil hmanhmawh thlak a awm lo anih leh hlimtakin kan inkawm ho ang a. Thingpui in pahin hmanhmawh miah lovin kan vei zawng a piang kan sawi ho ang a a ni mai a lawm.

OB dangte : A thakhawp a lawm. Zirtawp zan a ni bawk a, zing thawhtlai theih tuk anih vangin tlem a menrei deuh pawh a sual hlei nem mawle.

Chutianga zin dawn zan pawha ka chhungte bula awm hman lo leka min siamtu YMA an tih hi engemaw a lo nih reng reng a ka hriatreng thin le? Kan hruaitute ho pawh hi an tar a deuh tawh nge ka zin tur pawh min hriatthiam pui duh der loh chu le? Kan tlangval neih chhun lah hi hetiang lamah hian hriatthiamna chhe te pawh a nei lo nge, ban hma deuh rawt nachang hriat chu sawi loh zanrei tak thlengin SMS a hmet a hmet ringawt mai. Kan President leh Treasurer ten MUP Member ni tura kum tam an mamawh tawh loh thu an sawi mai mai ngaithla chunga zin dawn zan han hman zet chu bulhnai a awm a piang an ngeiawm a. Thingpui an siam zin poh leh thinrim a zual ve poh a ni berin a lang. Chutih lai a ngaihtuahna a awm chu (zep nak emaw) a YMA lo rem rem khawp mai “Tu hian nge maw YMA hi lo hmu chhuak kher kher maw le? A tel lo pawh hian kan kal thei tho awm si a?” tih vel a ni.

Mahni chauh in en a YMA- in thil tha tam tak a lo tih tawh leh a la tih zel tur te ngaihtuah miah loh chuan YMA-a tel hi a ninawm chang a awm thin reng a ni. YMA hruaitu ni mek te leh Member thahnemngai tak tak te pawh hian an mahni chauh in ngaihtuahin YMA hmalakna avanga thil tam tak an chan/hlauh phah tawh te hi han sawi ve duh se sawi tur an va nei ngah dawn rua em!!! Mahse, chuti zawng a thu la mai lovin dawh thei takin YMA tan hian an lo thawk tauh tauh a, chu an hnathawh avang chuan vawiin thleng hian mualpho lovin Nursery Veng ngei pawh hi kan la kal ve zel niin ka hre thin.

Tih tak takah chuan kei ngei pawh hian ka zin dawn zana ka OB pui te laka ka vui avang mai hian YMA hi han tawng vak tur ka ni reng reng lo, a tak takah chuan ka nun a thil tam tak min zirtirtu leh mi zingah mi pangngai ang thawthang a min lan mawi tirtu chu YMA hi a ni tih ka hrechiang khawp mai. Ka thahnem lo chung chung pawhin heti hian lo YMA ve tang tang lo ila chuan kan nu ngei pawh hi ka chhai thlu zo lo maithei asin. YMA avanga Pathian thil thlawn pek hlu tak ka dawn, Pawisa in a lei theih reng reng loh heng ka thiante leh ka thenrual tha te zawng zawng hi YMA hi lo awm ta lo se heti tak hian ka hnaih hauh lovang tih pawh ka hrechiang khawp mai. YMA avanga ka chan/ hlauh ai hian he Pawl avanga ka hlawh hi a tam zia chu nitin zantin hian ka hre thar fo thin reng a ni.

Mizoram leh Zofate kan dam khawchhuah ve theihnana a tul ang apianga hmahruai tura Pathianin YMA min pek hi ngaihlu tur kan lo ni. He Pawl-in kawng hrang hrang a hma a lakna leh hruaitute ngei pawh duhkhawp loh chang kan nei a ni thei, mahse, chung lam khian he Pawl thlaktu tur Pawl dang hi Zofate tan vawiin thleng a min la pek leh rih loh avang hian YMA hmalakna hrang hrang hi kan pawm a kan tawiawm rih phawt mai a dik ang. Zin dawn zan a ni emaw, zin haw zan a ni emaw, tih tur pawimawh dang kan neih te pawh a tul phawt chuan he Pawl tan hian kalsan chang kan nei ngam ve bawk tur a ni dawn lawm mi? Chutianga tha leh zung kan lo sen te chu YMA hruaitute hian min rul let thei dawn lo mah se, he Pawl din tu leh tun thlenga kaihruaitu kan Pathian khian a huntakah a let tamtakin YMA tana thahnemngai taka tha leh zung sengtu te hi a la rulh ngei ngei ka ring tlat a ni. Midang tana thil tha ti tur a min hrilh tu leh a let tam tak a rulh let min tiamtu kan Pathian hian min rul leh lo anih vaih chuan Lal-thuthleng hmaah kan la chhuahchhal ho dawn a nia.

Leave a Reply