YMA PLATINUM JUBILEE LEH YMA DAY LAWMNA HUN TLUANG TAK A HMAN A NI

– Zokunga
Secretary, NYMA

Platinum Jubilee Meidet :
Tunlaia ruahtui tlak dan te thlirin Ni 14.6.2010 (Thawhleh) zanah khan ruahsur ngei ngei tura ngaiha ni a. Hei vang hian Branch YMA thenkhat pawhin Platinum Jubilee Meidet tih theih loh tura ngaiin Hall chhungah Electric Bulb hmanga meidet ta mai te pawh an awm hial a ni awm e. Meidet tur buatsaihtute thawhrimna zawng zawng ruahsur avanga engmah lovah a chan theih mai dawn avangin kan hruaitute pawh an tawngtai urhsun hle a ni awm e. Kan tawngtaina te chhana awmin harsatna awm lovin kan hun tiam zan dar 8:30-ah Model English Medium School kawtah Platinum Jubilee Meidet tura lo buatsaih lawk chu NYMA President hmasaber leh tuna Branch YMA-a Adviser ni mek Pu K. Zoliana’n puithu takin min dehkai sak a, mipui tam tak pungkhawmin bengngawng tan pawh a hriat theih hial turin kut beng thawm pawh a ring a ni.

Zingkar Programme :
Nidang zawng aiin YMA Day (Ni 15.6.2010) tuka NI lo chhuak chu a mawi danglam bik emaw tih mai tur a ni. Vengchhung in kal pawhna kawngpui leh step vel zing dar 6:00 atangin a lun tan hle mai. Khawiah nge maw an kal dawn le tih mai tura YMA Member hmel hlim tak pu chunga an in sulpel zung zung hmel hmuh a nuam hle. Khawidanga kal tum an ni lo. Model English Medium School Gate bula YMA Platinum Jubilee lungphun hawnna a tel tum an ni zawk.

Zing dar 7:00-ah Bialtu MLA Pu R.Selthuama’n YMA Platinum Jubilee Lungphun chu ropui takin a hawng a, Member tlawmngai mi pahnih Pu Ria leh Tv. Puia te hnenah Platinum Jubilee T-Shirt a hlan nghal bawk a ni.

Lungphun hawn anih hnuah vengchhung a hnatlan ngaihna hmunah Member-te thahnemngai takin hnatlan zui a ni a, ‘Y’ & ‘A’ Section hnatlanna hmun a Member thawk chhuak te tan Pu S.K.Thanga’n Squash Bur 4 ngawt a lo hlui a, Pu S.K. Thanga chungah NYMA an va lawm tak em!

Chhun Programme :
Middle School kawtah dar 10:30 A.M-ah Programme tan a ni a, Section hrang hrang inelna neih a ni a, result hetiang a ni :

(i)Valleyball (Men) :
1st = Y-Section (‘A’ Team)
2nd = M-Section (‘A’ Team)
3rd = Y-Section (‘B’ Team) & A-Section (‘A’ Team)

(ii)Ball Race (Men & Women) :
1st = Tv. Lalsangmawia Colney & Nl. Lalhruaithangi (M-Section)
2nd = Pu P.C. Lalmalsawma & Nl. C. Lalthlamuani (M-Section)
3rd = Tv. Lalhuma & Nl. Lallianpuii (Y-Section)

(iii)Death Ball (Women) :
1st = A-Section
2nd = M-Section
3rd = Y-Section

(iv) Kawi inkah siak (Women) :
1st = Nl. Marina Zorinpuii (A-Section)
2nd = Nl. Zorini (Y-Section)
3rd = Nl. V.Vanlalsiami (Y-Section) & Nl. Lalngaihsaki (M-Section)

Chhunah hian MHIP, Nursery Veng Branch leh MUP, Nursery Veng Unit ten Valleyball Exhibition Match an khel bawk a, in hnehtawk taka an inkhel chungin chak zawk awm a ngaih miau si avangin MHIP an chak zawk ta hram a ni. Player-te hnenah hian lawman atan Sahbawn pek vek an ni a, lawman hi Pu Ropiangliana leh Pu R.Zotawna ten an tum a ni.

Zan Programme :
Pu R. Lalhmangaiha, President, NYMA kaihhruaina hnuaiah Model English Medium School-ah zar dar 7:30 atangin hun hman tan a ni a, Secretary Report, Kumpuan Thupui sawi, YMA Zaipawl, Solo, Instrumental Music leh Chawimawina Cerificate sem leh intihsiakna a ti tha Section hnenah lawman sem te a hun hman a ni.

Mi 115 zet hnenah hetiangin Certificate sem a ni :
(i) NYMA Office Bearer lo ni tawhte = 12 Nos.
(ii) Guinness World Record Bamboo Dance a telte = 20 Nos.
(iii) HSLC/Matric passed tharte = 35 Nos. (Mipa 12 & Hmeichhia 23)
(iv) HSSLC/Class-XII passed tharte = 31 Nos. (Mipa 10 & Hmeichhia 21)
(v) BA/B.Sc. passed tharte = 3 (Mipa 1 &Hmeichhia 2)
(vi) Infiamna a Medal late = 11 nos
(vii) Vawi 10 chin thisen pe tawhte = 3 nos

Member kal zat inchhiarna :
Zing, Chhun leh Zanah te inchhiarna neih a ni a, hei hi Section inelna pakhat atan hman a ni. Member kal dan hetiang a ni :
Sl. No. Section       Member kal zat             TOTAL
Zing      Chhun      Zan
1           Y-Section    21          24             55       100
2          M-Section   27          33             79       139
3          A-Section    47          33             50       130
TOTAL                     95          90            184      369

NOTE : Inchhiarna hi Programme tan rualin neih thin a ni a, member rawn kal belh leh te nen chuan hei aia tam zawk fe hi kal a ni. Zanah bik hian Vengchhung nu leh pa leh naupang Programme min rawn hmanpuitu mi 18 zet an awm bawk a ni.

A pumpuia Section inelna Result :
Pakhatna – M-Section
Pahnihna – Y-Section
Pathumna – A-Section

Tlangkawmna :
Kum dangah ruahtui tla avangin YMA Day kan hmannaah harsatna tenau kan neih phah fo thin a, kuminah erawh Pathian hruainain harsatna lian tham nei lovin hun kan hmang zo thei a, a lawmawm hle a ni. Zing, Chhun leh Zanah te Member thanem tak kan tel thei reng a, Item nei tur a ruat leh chanvo dang nei reng reng pawhin kan mawhphurhna theuh thahnemngai takin kan hlen thei a, a lawmawm hle mai! He hun hlimawm tak kan hman liam tak hi a lo thlawn a luanliam tir mai lovin, hun lo kal zel tura kanin lungrualna atan te, vengchhung hmasawnna atana thawhhona tha zawk kan neih theihna atan te leh tanpui ngaite kan tanpuina kawnga min ti chaktu atan hmang zui zel thei ila a lawmawm leh zual ngawt ang.

Hun in a herliam pui miau si avangin kham lo takin YMA Day, 2010 chu kan thlah liam a ngai ta si a, President leh Pu Chawngdinga hova zan taireka “Mi vengah zawng lunglen a na e…..Nursery Veng pawh zali kan chuang e” kan tihlai te kha theihnghilh a har tawh viau ang le…..!!!

Leave a Reply