YMA Platinum Jubilee mi tana inpein kan lawm dawn

Kum 1935 atanga 2010 chu kum 75 a lo ni ta reng mai, June ni 15-ah a pumhlum ang chu. A dintute’n Pathian rawn chung leh Mizote mizona hre reng chunga fimkhur taka an din vang a niang chu kum 75 thleng bahlah leh hniam lai awm miah lovin YMA hi a kal par par mai ni, Lawm ava phu em.

Heng YMA-in kum 75 a hman chhung hian kum engzatnge YMA Member i nih ve hman le…?

Kan Branch chuan kum 13 awrh chauh kan hmang ve hman a, a rei lo khawp mai. Mahse kan hman rei hman loh ngaihtuah chuan sulhnu tam tak chu kan hnutchhiah vehman tho a ni. ‘YMA chu tanpui ngaite tanpuitu a ni’ tih a nih angin mi engzatnge tanpui ngai nia i hriat i lo puih ve tawh le…? YMA kum 75 a tlin kuma YMA Member kan ni fuh hlauh hi lawm ila, Section, Branch-ah Committee Member leh Office Bearer kan ni hlauh a nih leh phei chuan a lawmawm hle a ni tih hi i hre thar ang u. Kumin bak hi YMA-in kum 75 atlin a lawm leh ngai dawn tawh lo.

A hlut zia hriain CYMA chuan lawm dan tur hrang hrang a duangin a kalpui mek tawh a, Branch tana tih ve tur te pawh a ruahman fel vek tawh a ni. Kan Branch pawhin he kum 75 tlin lawm nan hian tih tur hrang hrang a ruahman ve ta. Kan hriat angin Branch hausa leh intodelh kan ni lo; chuti chung chuan NYMA Executive Committee chuan ‘YMA chu tanpui ngaite tanpuitu, mite tana inpe thin, luang chhuak tur’ kan nia a hriat avangin neih neisa lo chung pawhin Member-te inpekna leh Vengchhung nu leh pa Tlawmngai inpe thinte hmachhuanin he hun remchang hi chutiang tih nan chuan hman ve a titlu ta a ni. Ban khur 1 tal, perek 1 tal, tha 2/1 tal, thingzai 2/1 tal, rangva baan 2/1 tal, thisen unit 2/1 tal, sum tlem lua leh tam lua awm lo talin, mahni tih theih ang ang thawhchhuahpui ve turin YMA Member zawng zawng leh vengchhung Nu leh Pa te kan inngen lawk a ni e.

Branch YMA-in tih ve tura a ruahman te :

1. Hmeithai In sak sak : Kum 13 chhung hian mi Branch tih chanchin kan chhiar fo va, tih ve theih atan a tha tih hre ru reng siin kan la ti lo tlat. Hawh u tun tum chu…..

2. Thisen pek : A mamawh apiangte hman tura kan neih hlu ber hlan hi YMA Member hei zat zinga engemaw zat hi chuan kan ti thei ngei ang tih hi a beiseiawm tlat a ni.

3. Chawimawina hlan :
a) Veng chhung mi, sport lama State level, National/International level pawha lawmman dawng chawimawi phu engemaw zat kan neih te.

b) Zirlai, HSLC chin chung lama chawimawi phu khawpa hlawhtling te.

c) Branch YMA hruaitu (O/B) lo ni tawh te…etc.

4. Jubilee Mei det : CYMA lam atanga ti hram tura beisei kan nih angin tih ve ngei tum a ni.

5. Jubilee Lung phun : YMA Golden Jubilee-ah kan phun ve hman lo tawh a. 10th. Anniversary kan lawm tumin kan phun lo bawk si a, tun tum hi chu a khan viau tawhin committee chuan a hria a ni.

Tih tur tam tak zingah Member te leh mipuiin kan lo hriat hma atana tha tlem azawng kan tar lang rihah ngai ila, YMA Kum 75 (Platinum Jubilee) hi hlim leh hlawk takin midangte tan inpein i hmang tlang ang u.

Leave a Reply