YMA ROREL INKHAWM VAWI 2-NA NEIH A NI

Central YMA Rorel Inkhawm Vawi 2-na chu October 19, 2018 (Zirtawpni) khan Vanapa Hall-ah neih a ni a, Rorel Inkhawmah hian ram chhung leh ram pawn atangin rorel palai 1517 an kal a ni.

CYMA Rorel inkhawm hi Pu Vanlalruata, President-in a kaihruai a, Rorel Palai kalte lawmna thu a sawi zawhin Pu Lal-rinawma CEC member chuan hunserh a hmang a, YMA Khawhar Hlabu (Solfa) chu Pu R Lalngheta, Vice President-in a tlangzarh bawk. He inkhawmah hian YMA General Conference Vawi 71-na 19th October, 2017 leh CYMA Rorel Inkhawm, 19th October, 2018 (Zirtawpni) YMA member boral mi 810 sunna hun hman a ni bawk. Member sun zingah hian Headquarters leh Sub-Headquarters hruaitu lo ni tawh mi 8 telin, an hming chhiar chhuah a ni.

Rorel tan a nih hmain a hnuaia mi ang hian General Secretary leh Finance Report ngaihthlak a ni:

1. General Secretary Report : Tv. Lalhmachhuana, General Secretary, Central YMA hnen atangin kum 2017-2018 chhunga YMA hmalakna hrang hrang leh chetvelna ngaihthlak a ni a, report hi ziakin palaite hnenah pek vek an ni. General Secretary Report-a a lan danin tuna YMA dinhmun chu hetiang hi a ni:

Branch awm zat : 804
Sub-Hqrs. awm zat : 5
Group awm zat : 47
YMA member zat :
Mipa : 254944
Hmeichhia : 172449
Total : 427393

2. Finance Report : Pu Fabian Lalfakawma, Finance Secretary, Central YMA hnen atangin kum 2017-2018 chhunga Central YMA Finance Report ngaihthlak a ni a, August 31, 2018 thlenga CYMA sum dinhmun chu hetiang hi a ni:

Opening Balance : Rs. 2,61,42,421.99
Sum hmuh zawng zawng : Rs. 5,15,42,164.88
Sum hman zawng zawng : Rs. 3,32,40,955.80
Closing Balance : Rs. 1,83,01,209.08

Report ngaihthlak a nih hnuin Rorel tan a ni a, thu ngaihtuah tura chhawp chhuahte hi hlawm hrang hrangah then a ni a, hengte hi nguntaka sawiho a nih hnuin a hnuaia mi ang hian pawm a ni:

I. YMA KHAWIH :
1. Mizorama Kohhran hrang hrangte nen ram leh hnam humhalhna kawngah thawhhona leh inpumkhatna tha zawk kan neih theih nan Central YMA-in hma la rawh se.

2. Thingtlang lama zirna a lo that zawk theih nan Central YMA-in hmalak ni rawh se.

3. ‘Mizo hnam incheina hi Patent tura hmalak ni rawh se’ tih chu ‘Mizo hnam incheina hi dan anga humhalh tura hma lak ni rawh se’ tia siam remin CEC-in a tul anga a lo bawhzui atan pawm a ni.

4. Mizo tawng humhalh kawngah Central YMA-in hma la rawh se.

5. Zu leh Ruihhlo do kawngah tun aia nasa leh chak zawka Branch tin ten hma kan lak theih nan Central YMA-in hma la rawh se.

6. ‘Sawrkar atanga Development fund hna thawh (i.e Link Roads, BADP, NEDP & Other Construction) hi 70% tala hnathawh a nih theih nan Central YMA-in hma la rawh se’ tih chu a hnuai a mi ang hian siam remin “Sawrkar atanga Development fund hna thawhte hi a tha thei ang bera thawh a nih theih nan Central YMA-in hma la rawh se” tiin lungrual takin pawm a ni.

7. Mipui ten Ration Buhfai leh Gas buk dik leh tling a kan lak theih nan Central YMA-in chak leh rualkhai zawk in hma la rawh se.

II. SAWRKAR KHAWIH :
1. Mizo hmeichhiaten hnamdang pasal (Tribal-in Non Tribal ) an neihin, Schedule Tribe Status hlihsakna tur ‘Social Custom Bill’ Mizoram Legislative Assembly-a pass a nih theih nan Central YMA-in hma la rawh se.

2. National Register of Citizens (NRC) hi Mizoramah kalpui ve ni rawh se.

3. Champhai atanga Tahan (Myanmar) Bus Service tir turin Sawrkar-in hma la rawh se.

III. KUMPUAN RAWTNA :
Kum 2018-2019 chhunga YMA Kumpuan atanaThupui hrang hrang rawtna lut – 1. Zirna Uar 2. Ruihhlo Do 3. Ram leh Hnam Humhalh – tih atangin, kum 2018-2019 chhunga YMA Kumpuan atan “Ram leh Hnam Humhalh” chu lungrual takin pawm a ni.

IV. Kum 2018-2019 BUDGET :
Pu Lalrochuanga Pachuau, Treasurer, Central YMA chuan kum 2018-2019 atana Central YMA Budget ruahman, Rs. 1,45,12,600.00 chu a pharh a, Palaiten an sawiho hnuin lungrual takin pawm a ni.

Rorel zawh hian Ramngaw leh Nungcha Humhalh tha Branch leh Group, YMA Chanchinbu la tha Branch leh Group leh Branch YMA Chanchinbu tha thlan chhuahte hnenah lawmman hlan an ni.

Rorel Inkhawm hi hi Dar 4:20pm ah zawh a ni a, hemi hnu hian CYMA Office Complex-ah Rorel Palaiten zanriah an kil ho a, zan lam programme hman chhunzawm a ni.

Zan inkhawmah hian President Pu Vanlalruata chuan YMA Apps tlangzarhin thu a sawi a. He hunah hian hun reitak YMA hruaitu lo ni tawh leh ni mekte hnenah ‘Hruaitu Hlun Chawimawina’ hlan an ni a. Tin, Tuihna Humhalh tha, Faina leh Thianghlimna kawnga hma la tha, Inter Branch YMA Video Clip tha leh Kumpuan bawhzui thate hnenah lawmman hlan an ni bawk a ni.

Tin, zan inkhawmah hian midangte tana Thisen pe hnem – C Lalremruata (vawi 69), Electric Veng Branch, Aizawl; RC Rokhuma (Vawi 67) Mission Veng Branch YMA, Aizawl; Rebecca Saimawii (Vawi 56) Dawrpui Branch, Aizawl; Zothantluangi, YMA Mission Veng Branch, Aizawl-te bakah Nl. Lalremsiami, 18th Asian Games, 2018, Silver Medalist (Hockey)- te hnenah chawimawina hlan a ni bawk.

Leave a Reply