YMA ZAIPAWL AH KA TEL VE

– Ch. Lalnunmawia (Y-Section)

Kum 2008 – a CYMA zaipawl intihsiaka kan veng YMA zaipawl member ka ni ve thei kha a hun laiin a hlutna ka hrethiam pha lo a, tun hnua kan intihsiaka kan zaipawl zai lai T.V a an rawn replay ka thlir hian, kei tehlul, nu leh pa atanga chhut pawha zaithiam chhungkua ni miahlo, ka lo telve thei kha a ropui ka tiin ka lawm thin. Khual khua leh veng pawna thian te’n ‘T.V ah in zai lai kan en a in veng chu in zaithiam ngei mai, a reng reng thu ah khatiang zaipawl thiam taka itel ve thei kha ilo zaithiam ve tak tak ani lo maw?’ min han tih chang te hian lawmawm ve duh deuh a nia. ‘Hmanni ah RV ah ka hmu che’ in tih ai chuan, kan veng zaipawl member ka nih ve avang hian CYMA General Conference-ah vawithum lai platform ah ka zai ve tawh a sin, duh duha zai leh din mai mai theih a ni miah lo a nia aw.
Pu Malsawma Colney (a thlarau chawl hahdam se) tawngkam tak in, ‘CYMA, CKTP Conference a platform-a la zai pha ve lo zawng ban phur ru’ ti ila Pu JKa leh Pu Achhuana ho hian in phar suau mai ang. Zoram mipui zingah hian hetianga zaipawl member zai ve pha lo hi nuai 10 chuang zu han awm a mawle, chuvangin kan veng YMA zaipawl member ka lo ni ve thei kha ka inchhuang a, a ropui ka ti tawp theilo. Kan veng Zaipawl member ka nih ve avang khan kawr pahnih, kamis eng zak mai, Tv. Madina, tenor thiamin form atana a thlan leh T-shirt vut buak rawng, NYMA tih chuang ngei mai a thlawna kan dawn te kha kei zawng ka ngaihlu teh mai ania. Kan president Pu Chhanmama leh Tv. Mavena hian an dawng ve pha lo tih hi ka hrechiang. Veng hming chuang kawr ha pha nih hi a namailo teh ania. Kan hruaituten veng tana kan tih ve theihtawk ti tura min ruatna kan lo tih ve hian kan veng a ti mawi a, mahni ngei pawhin a zar kan zo ta thin ani, kei teh lul hian veng tana ka tihve theih tawk kan hruaituten ti tura min tih ka tih ve avangin T-shirt pahnih leh kamis pakhat NYMA tih chuang ngat ka kawl ve tawh ani, heng kawr te hi sum in a lei mai mai theih ani lo kawr hlu tak, tu leh fa te hmuh leh hriatreng tura dah that tur, ka hak phal zen zen loh an ni.

Kan hruaitute thahnem ngaihna leh CYMA hotute duhsakna avangin tun thla ni 15-17 chhunga CYMA General Conference ah kan veng YMA zaipawl chu a tawp zana zai tura ruat kan ni hi a vanneihthlak tak zet ani, Hun tha ber kan han chang leh zela, Kan zaipawl te an vannei hle, zaipawl member nih ve te pawh a chakawm rum rum alawm le. Mahse hnahhlui chu an til a, hnahthar alo chawr leh angai bawk si. Theih nise Pu Matea ho ngeia, ‘in zam mai dawn em ni, teuhlo mai, a teuhlo mai’, ‘Atlawm ve lo Ropuiliani sappui tawnah’, han tih leh te a va chakawm tak em.

Kan veng zaipawl member te in van vannei em!, hetiang hun tha a zaipawl member in ni thei hi in awhawm tawp, nakinah keini ang rual in nih ve hunah chuan zaipawl member-ah hian tel duh mah ula kan hruaituten nangni ai chuan in fate an an duh tawh zawk ang, Vawikhat pian ve mana veng tana pen chhuak thei nih hi a ropui asin, tun hunah pawh zaipawl member te kan veng hmingmawi nan in pen chhuah a ngai ani, nu leh pa te pawhin kan veng YMA zaipawl member-te veng tana an feh chhuahna turah hun remchang siamsak hram hram turin in buatsaih ang u, Tun tum CYMA General Conference hi hruaitu thlan kum a nia, Kan hruaitute zinga mi Pu Roneihthanga pawh CYMA hruaitu tura nominate a ni a hei vang hian kan hruaitute pawhin theihtawp an chhuah a, zaipawl member leh palai kal tur tan Bus 2 an hmang dawn ani, Tun tum na na na chu Nursery Veng mawi nan kan tih theih tawk theuh ah Nursery Veng tan ipen chhuak ang u

Kei zawng ka zai zel dawn kan veng Nursery Veng tan.

Leave a Reply