YOUNG MIZO ASSOCIATION : KHAWTLANG MIPUI INKARA IN UNAUNA THINLUNG ROPUI

Mizoram hi state lian vak lo, Myanmar leh Bangladesh in a karcheh niin Mizo te vangtlang nun hi mihringte chhungril thatna mawi taka lanchhuah tir tu ani. Mizote vantlang nun hi ‘Tlawmngaihna’ hian lâ kan phiar ang mai hian a phiar khawm vek a chu ‘Tlawmngaihna’ lâ in a min phuar khawmna chu a chah mai loh nan leh vawn that reng anih theihna atana pawimawh em em leh hma la tu chu Young Mizo Association hi ani. YMA hi June ni 15, 1935 a din kha niin June ni 15,1947 hma zawng kha chuan Young Lushai Association ti a hriat thin ani. Central YMA hnuaiah hian veng hrang hrang leh khaw hrang hrang ah YMA Branch hi din niin mi tupawh kum 14 alo tlin chuan YMA member atana chhiar an lo ni thin.

Mizoram chhung chauh nilo, Mizoram pawn hmun hrang hrang, Mizo thalai te zirna vang emaw an hnathawh vanga an awm naah tawh phawt chuan Tlawmngaihna vawng nung zel turin YMA Branch pawh din thin ani. He ka thu ziah pawh hi kum 32 teh meuh mai Mizoram chhunga ka awm atanga ka tawnhriatte an ni. Ka hna avang hian zirlai te he ram dung leh vang fanga leilung lam zir chiang tura zin kual pui thin ka ni a, hei hian Mizo te vantlang nun ka tem ve theih nan hun tha min siam sak ani.

YMA hian vantlang nunah thuk takin zung a kaih a, bungbel leh thildang, chhiatni thatni atan mamawh tur te kawlin a mamawh apiang hawh theih turin an inhawng a, tlem a harsa deuh te chu a hawh man pawh an thing ngailo ani. Chhungkaw harsa leh damlote leh thihna thilah in kanna leh ralna pek te hi he Association in a tih ngei ngei thin ani. ‘Faina’ pawh hi an thupui pawimawh tak ani a, veng chhung tihfai hnatlang te, kawngpui dung leh tuikhur tihfai hnatlangte an koh thin ani.

Leilungin chhiatna a thlen chi hrang hrang, ram kang, lei min leh lirnghing te alo thlen hian mizote vantlang nun mawi tak hi alo langchhuak thin ani. Heng chhiatna tawkte tanpui tur hian chhun leh zan pawh sawiloin a tul apiang tiin an buai thin hle. In leh lo chhia te chu an sak that sak thin a, tui lianin mi a lak in emaw leimin in mi a hnawl pawhin, chirh leh tuilian karah, ruah sur hnuai ani emaw ni lo emaw, ruang zawngin ni 7 chhung phunnawi miah loin an bei char char mai thin. Tun Corona pandemic ah pawh hian YMA member tam tak chu a tul apiang ti turin an in pe tawp mai ani.

YMA hian thralai te engkima hma an sawnna tur hi a ngaipawimawh em em a, kum tin infiamna te buatsaihin, zirna , infiamna leh mi huaisen te chawimawina te an nei thrin.

Mithi an awm chang hian chhiat tawk chhungkua inah YMA member te hi an kal khawm thin a, tihtur tul, thutna rem te, sound buaipui leh thildang tul ang ang an ti mai thin. Mithi chhungte ralna tur bawm te hungin, thlan laih leh kuang siam thlengin an thawk vek thinin zan thum tal mithi chhungte an riah pui thin. Kum tin member fee cheng 5 khawn thin leh mi inpe te thawhkhawm te leh a tul tul thawka inhlawh hi YMA in sum a hmuhna ber te an ni. Tin, YMA member te hian sorkar pisa tihfai te blanket leh rizai suk hnatlang te leivung paih te leh lei laih hna te thlengin sum tuak nan tlawmngai te hnatlangin an inhlawh ve bawk thin.

YMA hi mizote vantlang nuna mi pawimawh tak niin, Sawrkar pawh hian thuthlukna a siam tur kawng tam tak ah YMA hi a rawn nasa hle. Hetiang taka phut let neilo a vantlang tan a Association ding nghet leh nghawng nei lian hi India ram khawi state ah mah hian ka la hre ngailo. Mizo vantlang nun mawi tak tem thei a ka awm hi ka inchhuang hle ani.

Zofaten ‘Sem sem dam dam eibil thi thi’ kan tih hi India ram hmun dangah chuan ‘Savrve Bhavantu Sukhinah’ tih hi a tlukpui ani awm e. YMA hian mihring leh mihring inkara inunauna chawisan piah lamah lam hnaia kan thenrualte leh lam hlaa kan lungduhte thlenga inngaihsak leh indawm kang tawnna thinlung nei Pawl kan nei hi kan vannei hle ani.

Prof. Raghavendra P. Tiwari
Vice-Chancellor
Central University of Punjab Bathinda

(He Article hi Chandigarh chanchinchu lar YUGMARG, ni 25.08.2021 a chhuak a Prof. Raghavendra P. Tiwari ziah a ni a, kan ngenna ngai pawimawh a Mizo tawng nalh taka min leh sak tu Nl. LV. Lalsangkimi, Y-Section hnen ah lawmthu kan sawi tak zet a ni. Ed.)

Leave a Reply