ZALENNA HLA MAWI!

– C. Lalbiaknunga

Vângpui chhaih hun, hun thengthaw lo thleng tur inthoh thâwmin mi a han hrût a. Kawl êng, khawvar hmahruaituin mi a han hnêk dek dek tawh chinah hi chuan nun hi eng emaw ti tak hian a insang mar vek hial thei. Hleilubial hêl rah hmin hmasa váiin huamhauh taka zâr tin thunun tuma a bawh ruak ruak kâra pît rual an teh hek hekte chuan kan tel ve lohna khawvel an dai dar bîk hial emaw tih tur a ni.

Tlaiberh pui no hrâm hruai, a no buchip enkawl vanga thawhrimna zualpui kal san, hlimtaka favang kawl êng an han chhaih har harte hi chuan dâi ngai loh ram tha bawh tur hian min hruai luih ngar ngar an tum zawk ni hian ka hria. A ni, hlimna ruama lu lam leh mawng lam hre lêk loa boruak thar duhawm a thlawna chêna chhek turin!

Kawng chhuatte chu a hnawm chiap a, dâi nge ruahtui hnuhnung hnuhma tih hriat hran rual ni lo mah se, ngalvapual hram thawveng ta lutuk chuan favang lo thleng tur hmuah a hun tih erawh a puang mêk a ni. Vabêk-in khâm thlí an chhaih a, daikatin kawldâi buk kar atangin nizung chhuak mar at mai an chhaih thung. An hlimna chu an zai rimawi atanga teh a ngai a. Thutlukna siam sual theih tak tur niin-khawi zawk nge tuipui fâl chi ang tih hriat hran theih a ni lo!

Zân chên rannung danglam pui pui leh phengphehlep hmulphurh chhe pui pui khawhaite chu khaw êngah lungphûr hmanhmawh taka hmanhmawhin an insaseng hnuhnawh a. Nizung lo kalna lam hawia boruaka an lêng chuan chuante chuan favang ni chhuak duhawmna an tidal phak lo.

Thelret zîk sen chunga chuanga, tho hma inti bîk fahrana chhemhur pa inchei melh melh chuan kawlkhau bepui tlânte chu a hmusit em maw ni – a thlek tak doh doh a. Dawlrêm thahnemngai em em maiin rawl tawp chhuah a hunbi i her danglam tur a puangte chuan sawi duh a ngah mang e. Mâi tang rah thle ngiai mai leh hlobeta daifim tling leng maite chuan ngâwi rengin he hunah hian min lo lâwm ni hian ka hria a.

Anni chu her liam thuai dâwn mah se keinin hunbi kan chhiar dik thiam theihna turin eng emaw min tihsak an duh a. Fûr rorelna ippik chûn mai, chhûm chhah leh ruah bawhawk lal hrawtna hunbi a kiang thuai dâwn tih min puansak an duh a ni. Chhiatna kâra lungngaihna puandum kan zâr aiin chiangin khawvêl tán puan thar min zarsak a. Hun khirh kara mittui nena hnuai lam biha hah thinte hi thlasik rim leh favang boruak thiang hmangin kan lungngaihna mittui min hruksak tumin theihpatawp an chhuah mek a ni.

Ding la, vàn lam hawiin i mit len la, zawngtah lér leh khawibêlpui châw zawngte hi thlír ve chhin teh! Vân sânga vamur lêu leh daikat hla thunawn chu ngaithla la. Tlaiberh no hrâm hruai, no chawma thawkrim zo chawlhna chènte zâi chu ngaithla ve chhin teh! Furpui insaseng thawm hriaa vângpui chhek tum tehhek rual ram awih hlate hlei hlei chuan zalênna hla mawi min chhiah tâk hi! Changkâk chhungkua khian hunpui hmachhawn tura chakna min tiam a; hleikapsen pa thlamuanna khuan beiseina nena dawhtheihna dik awmze rilzia min kawh hmuh kan ti lo phal dâwn em ni! Fûr rorelna insaseng lâwma vàn dumpawl thiang ruihte leh luite luang sawt det dette inlaichinna hian kan tán awmzia an nei a. Âwm sêp dawrh dawrha hah rim tawng mêkte lungngaihna leh beidawnna min chhilhsak turin boruak thiang nen an lo thawk a ni. An man theih theih min man a, beidawnna leh hripui ruama vâkvâi mêkte tán zalênna rimawi min tumsak a ni.

Engtikah emaw chuan hun a inher danglam ngei ang a, fur khawhnawm kiangin vângpui chhaih hun a lo her ang. En teh u, thlasik dâi hmahruai a lo thleng e, ” tiin – Anni hi kan zâwm ve dâwn lo’m ni!!!

Leave a Reply