ZO ZEPUI NUNMAWI

Kan pi leh pu atanga ‘Mizo ze tha leh mawi’ kan lo tih zingah rinawmna te, tlawmngaihna leh huaisenna te hi a langsar pawl a ni awm e. Heng “Zo zepui nunmawi” ti-a ka han vuah zingah hian “Rinawmna” hi Mizo te nunah a tlangnel viau nge a mikhual deuh duk zawk tiin ngaihtuahna i hmang phawt teh ang aw. Rinawmna hi mihring zia a bet tlat, a putu zia sawina a ni a. Mi rinawm chu mi rintlak a ni a, a ngaihsanawm hle thin. Mimal nunah rinawmna a hlu ang bawkin chhungkua leh khawtlangah a hlutna a nasa. “Ze nghet” tih thu ziaktu chuan hnam dang atanga Mizote’n suahsualna kan chin chhuah ni thei awma langte a sawi a; chungte chu- tualthah te,uire-na leh rukruk chin te a ni. Hnam dang tih dan kan lak luh a ni meuh ang em aw tiin a ngaihtuah theih bawk awm e.

A nihna takah chuan mihring hian Ze chhe tak kan nei vek a, Hla phuahtu pakhat pawhin “Ka pianpui nungchang min ti mualpho tu, ka chhantu kross min ti mawitu” a lo tih hian a sawi hle awm e. Chanchintha hian kan nun hi chiahzawp lo phei se chuan kan pianpui nungchang hi tha lo thei tak a ni. A nih leh, Kristian deuh vek kan nih tawh hnu hian enge kan an tak zel le ? Mahni theuh inbih teh ang u. Mi rinawm leh dik tamtak, Zofate zingah kan nei. Hetih rual hian kan nunphung leh ze chhe lam hi a langsar fo si a. Hnam,dang, ring lo mi kan tihte hian mi ring ngam ang em ? ‘Mizote hi Krirtian an ni a, an rintlak ang’ an ti ang em le? Midang kan puh thei lo. Nang leh kei hi kan tel tlat. Mizo nula leh tlangval Kristian inti leh YMA member te hi Biak In piahah kan nun a danglam em? Thianghlim tawh lo tih inhre reng si a Inneih kawr var, Virgins ho hak tur kan ha ve ngawt ngam thin em aw! Lang lo tura thuhruk engmah a awm thei lo. Mihring pawh kan lo bum thei tak tak love.

YMA nula tlangvalte hi mahni chhungkaw sum leh pai vawngtu atan ka tlak em? Chhungkaw chabi bawr kawltu i ni thei em? Nu leh pa rin kan kai em le? ‘Ani chuan a tisual lovang, a tidik ang’ tih ngam khawpa rintlak kan ni em aw! Mi rinawmte chuan an dam chhung la la pawh hian an thiltih that leh nun dik man an seng thin. Mizo thalai zingah
chhungkua, khawtlang leh kohhran tana tangkaina nei hauh lo, hnawksak zawk mah ni-a lang an awm laiin mi rinawm leh fel, Pathian tih mi pawh kan ramah hian tghahnem tak kan nei. Mizo ze chhe tak ni-a lang fo chu kan ngaihsan ruk tak pawh fak leh chawimawi kan ui tlat thin hi a ni. A ngaihsanawmna leh thatna kan sawi mek laiin a tlin lohna engemaw tal sawi tur kan zawng talh fo. In chawimawi hi kan harsat viau mai. Thih ni-ah erawh kan ui lo leh hlein alang.Kan pi leh pu te kha chuan tlawmngai huaisen te kha an damlai ngeiin ‘Nopui’ an dawmtir thin a nih kha. Ka hla phuah ve pakhat, Zo Zepui Nunmawi chang tawpna hian tlang han kawm ve ila;

Ui rena sual leh rukruk hlemhlet hluar ngai lo
Hnam rinawm kha ni ngai e, zomi lengte
A tu-ah hin zei tin hme lkungmu luahtu?
Kan hnam zia, nun phung mawi dartui anga luang kha
Zo Zepui Nunmawi, liam lo la, vul leh rawh.

(Hei hi CYMA Gen. Conference 2002 Souvenier atanga lak chuah, Pi Lalsangzuali Sailo (L) in August ni 20-a a ziah kaihtawi a ni)

Leave a Reply