Zonunmawi (Tlawmngaihna)

Kan pi leh pute nuna bet tlat chu aia upa an zah thiamna kha a ni awm e. Naupangin puitling thu an hnial ngai lo va, thil tak tak tih dawn chuan upa zawkte thu leh hla an la thiam em em a, khawi ilo kalnaah thalai zawkte chuan upa deuhte chu an hrehawm ang tih an hlau em em a, a theih chen chenah an chhawmdawlin an phur te leh an thil ah te an chhawk fo thin a, ei tur leh in tur pawh upa zawkin an eia an in phawt loh chuan an ei chak zawng tak pawh ni se, an ei hmasa mai mai ngai lo a ni.

Upa zawk te hi an mawl biak mai mai ngai lo va, an hming an hriat loh pawh koh dan awm takin, “ka pi, ka pu, nu, pa, u” tiin an ko mai thin. Inmawl biak ngawt aia koh dan mawi leh zahawm tak hmanga inkoh hian mihring inngainatna leh induhsak tawnna a siam theih bakah zahna lantirna pawimawh tak a ni tih an hmu chiang em em a, he an thil chin thin hi chhawm zel tlak leh duhawm tak a ni a, zonunmawi kan tih zinga bet tlat a ni awm e.

Aia upa tirh an hnial ngai lo reng reng a, an tirhnaa an kal avangin beisei an nei ngai hek lo. An zahna an lantir bakak an nunah zonun ze mawi tlawmngaihna kan tih te pawh a lang chhuak mai thin a ni. Tunlai thangthar leh naupangte zingah tirh kal hleih theih loh an tam ta viau mai. Aia upa chhang zawt zawt a, ngeiawm taka hnial zawt zawt thinte pawh hmuha hriat tur a tam ta. Kan khawlai nun hona lamah chuan eng pawh lo ni se, social media lamah ngat phei chuan thalai tam takin aia upa kan chhan thin dan te a mawi loin chhiar pawh a zahthlak hial thei nia, mi pangngai deuh tan phei chuan lo ip deuh chawih chawihna tur a awm fo thin. Kan zonunmawi tak mai, aia upa zah thiam pawh hi thangtharte chuan an theihnghilh zo tan ta, inzirtir thar ngai tak a ni awm e. A chhawm nun kawngah theihtawp i chhuah tlang ang u.

Leave a Reply