ZU ZAWRH EMAW ZAWRH LOH EMAW

– Tv. Lalrinzuala Chawngthu, M Section

Thil tul dang tam tak ngaihtuah zut zut chungin hmanhmawh baklengin thlanmual a lo thleng a. Thinghnah pakhat lek a lo awm pawha sa phat thin a nih nak-a-laiin a nunna nena inzawm tlat a pasal thlan chungah ngei chuan tlangval 4-in a senchi an lo in khalh khalh a hmuh chuan a lum nghal phat! A fa rual vek lehnghal. A chhak atang chuan a’n thlek vang vang phawt a, thinrim insum takin a khak ta a. Anni lah chuan hre lo ang hmiahin an in chhunzawm lui zel tho a.

Sorkar chawlh ni pawh ni lo lehnghal chhun pachangah pachang, “Pute khua chu nuamsing khaw…” ti ni awm taka ni sa vawl vawl hnuaia step lun tak mai sira lo mu chuan, ram hla tak ata fapa tlanbo iangin a neih zawng zawng a rawn chen ve ni maw? A nawm lutuk vang nge a hreawm luattuk vanga muhil ta bawrh bawrh ni zawk ang maw? Engpawhnise, pem lehkha ni lo; zu leina bu nena lo lut a ni miau a, officially-in kan vengmi zawng a ni mawlh lo. Mahse, hmutu tam tak chuan kan veng niah an ngai tho si. 2 wheeler pakhat, tlangval la naupang angreng tak bag dum ak khalh a lo tlan vang vang a. Kawng chep tak kara lirthei veivak bakah West wineshop kawta lirthei intlar avang chuan a ding mai thei lo, a’n nghak deuh vang vang phawt a. Zu lei avanga mahni kawta lirthei hung thei lo leh garage kawta zu leiho lirthei hun avanga duh huna lut chhuak thei lo pawh an awm fur.

Tunhmaa Lalsangzuali Sailo, F Tlangsiama, Gnat Lalrinchhana te veng tia Nursery Veng min sawi thintu te leh an thlah kal zelte chuan kan veng hming leh zu dawr an sawi belhbawm chat chat tawh a. ‘A hming hrim hrim pawh hi a hniam’ tia min fiamtute bawk khan phur taka ‘black-in a lei theih..’ an tih tawh chuan kan veng hming an thinlungah a lo lang ta nghal bawk. Thim hlimah thlanmual leh kawngkam biru deuh laia tlangval 3/4 an thut bial laih laih tawh chuan nunau leh hmeichhia, tlangval zumzuk deuh tan kal pelh ringawt pawh huphurhawm a tling. Phalna nei thlapa a zawrhna hmun ngeia lei an nih miau avangin tu han khak ngam an ni lo a, an lei tawh chuan an ta, an in tur a ni. A inna hmun tur bar kan la neih miau loh avangin a rem remah mobile bar siamchawpin an kil bial mai thin. Kan tlangvalte ni vek lo mah se a hmutute chuan mi dang niin an ngai ngai lo.

Zan a lo thleng. Nula rim leh tuldang vanga kan veng kawngpui sira lirthei hung meuha lo lawi lutte haw tur chuan
an bike seat lo zai thler leh lo khawih pawi an hmuh leh a then petrol lo hipsak an ni tih an inhriat chuan an sa phat lo thei lo. Pawn lam atanga lo leng lut thenkhat, ngaihzawngte nen inthlahlel taka nui har har paha kan kawngpui leh kawtkai thlamuang taka zawh te lah t-shirt dum ha thang, harhfim lo chi deuh thenkhatin ‘Kan leido laiten min rawn run e’ ti ni awm takin an lo thuai ve leh nawk mai zel a. A then thlakhawnga an tlanchhiat laiin titiautu tenawmte lah an champion no mawi dawmtu hawi san thung. Nursery Veng mi vekah min ngaizui leh fo. Pawn lama nula rim thin kan tlangvalte chu an nula rim leh an chhungten zu dawr chungchang an lo zawt nawlh nawlh a, a ham strick zual deuh phei chuan fanute fa (tu) seilen nan athlum-a-al kan ei zana veng hi min itpui lo lek lek tawh a; nula rim tuma lo leng thin pawn lam tlangval te leh tuldang avanga lo leng thin tlangval te lah chuan chhunlawna lo len chu thih hreh takin an hreh tawh, bag dum ak phei chuan.

Aizawl veng thenkhat tunhmaa zu zuar an tam leh insual buai an uar avanga tun thlenga en dan riau nei mi tam tak an la awm ang hian vawiina he venga cheng te leh kan nau te hi veng dang hian min en dan riau an la nei ve a nih pawhin veng dang tawn kan tawng a ni ve mai dawn a. Kan nauten inrintawk lohna an thanlenpui ta a nih pawhin fuih vakin awmzia a la nei lo mai thei bawk. Kan veng naupang tam tak hian mahni veng chhungah ngei paltlang hreh bik riau thler te an lo nei ta hial mai. Veng thenkhat tana pawi lem lo nia lang hi keini ang veng thang ve tan mekte tan chuan a pawi em em a. Veng thenkhatah zu dawr hawn hian harsatna a thlen loh avanga kan vengah pawh harsatna awm lo tura ngaih tlat hi a dik lo tih nasa takin kan tawn buak atangin a lang a ni.

Bungkawn chhunga kan awm lai ata tawh ‘he veng hian zu leh zu in mi a tawngpawng doin a haw ngai lo a; zu siam
leh zawrh erawh vawi za tam a lo do tawh thung’ a. Kan tawrhna leh zu dawr nghawng chi hrang hrang avangin Presbyterian Kohhran Pavalaiin tharum telh hlau leh fimkhur taka thla chanve chuang an dodal tawhna nghawng hi a lian chho telh telh dawn a ang. Mawlmang takin zu lei tumte lei lo turin an lo ngen mawp mai zel a, sorkar dan siam tlawhchhan emaw dodal tur emaw an hre hek lo. An hriat chhun chu Pathian an lama tang niin an ngai a, veng mipui tam berin an thlawp niin an hre bawk. Hei hian phurna, chakna leh feina a pe zel a ni ngei ang
tel leh thlawptu an tam telh telh danah hian.

Heti zawng hian a sawi theih ang em? Nursery Veng hian kawng khat chiah zawh tur a nei – zu zawrh emaw zawrh loh emaw…

Leave a Reply